Ostale su tri sirote male,
Mati in je umrla,
Otac in se oženil,
Sebi ženu dopelja,
Dici slabu maćehu. 5
Kad ju kruha pitaju,
Zemljicom ih nasiti,
Kad ju piti pitaju,
Žuči i osta i’ napoji,
Kad ju faše pitaju, 10
Šarom i’ zmijom ofaša,
Dicu šibom pribija,
Ća od kuće odganja.
Dica idu plačući,
Koru kruha proseći, 15
Svagdi dojdu, svak in da.
Zvonaru se namire,
I zvonar i’ upita:
„Kamo male sirote?"
A oni mu odgovore: 20
„„Oj ti božji čoviče,
Mi tražimo cimiter
Za nać naše majke greb.““
Zvonaru se smililo;
Pelja dicu v cimiter, 25
Pa njim kaže majkin greb.
Dica počnu plakati,
Svoju majku vikati:
„Crna zemljo, otvori se,
Naša mati, ustani!“ 30
Tu se čudo dogodi,
Zemljica se otvori,
Mati njim se ustane
I dičici govori:
„„Male moje sirote, 35
Što mi mira ne date,
U ovoj crnoj zemljici?
Crna j' zemlja kuća moja,
Škura, tamna postelj moja.
Draga moja dičice, 40
Sad mi ote na Trsat,
Majki božjoj trsatskoj,
I ja je oću moliti,
Ona će vas pomoći.““
Dica idju na Trsat, 45
Majki božjoj trsatskoj,
Počeli su moliti,
Okol oltara oditi,
I Mariju moliti:
„Pomozi nam, Marijo, 50
Naša mat je umrla,
K vami nas je poslala.“
A Marija sve to zna,
I dičici govori:
„„Aj vi mala, dičice, 55
Bog vas oće pomoći!““
Malo vrime postalo,
Bog posla tri anjela,
Dicu s dušom razdile.
Pak ji uzmu na nebo, 60
’Di se vazda vesele
U tom raju nebeskom
I u koru anjelskom.
