Sv. Katarina
Sveta Katarina, ka j’ bila jedina,
Ka j’ bila jedina oca Konštantina.
Došli su ju prosit tri kralji od svita,
Da bi oni rada Katinoga cveća.
Pa govori otac, otac i majčica: 5
„Sad ziberi, Kate, koga tebe drago.“
„„Neću, ćaće moji, nigder nijednoga,
Leh ću, ćaće moji, oca nebeskoga,
Ki me bude vadil svete pisma štati,
Svete pisma štati, evanjelje znati."" 10
To se j’ ocu, majke jako na žal zelo,
Pa govori otac, otac i majčica:
„Oj vi slugi moji verni i neverni,
Kola mi tešite, britvi mi brusite,
Kćerku Katarinu na nje postavite." 15
Kola ni maknuti, britvi ni taknuti,
Katinoga tela nigdere ranjena.
To se j' ocu, majke jako na žal zelo,
Pa govori otac, otac i majčica:
„Slugi moji verni, verni i neverni! 20
Ote va goricu, storite tamnicu,
Kćerku Katarinu nutar postavite,
Nutar postavite do puneh sedan let.“
Šli su va goricu, storili tamnicu,
Kćerku Katarinu nutar postavili. 25
Kad se j' navršilo do puneh sedan let,
Već govori otac, otac i majčica:
„Slugi moji verni, verni i neverni!
Ote va goricu, oprite tamnicu,
Katine košćice na vetar hitite, 30
A bele ručice majke donesite.“
Šli su va goricu, oprli tamnicu;
Tamnica zasveti kodi sunce žarko,
Deva mašu maši, Kate njoj odpeva. —
Sad govore slugi svetoj Katarine: 35
„Sveta Katarino, oprosti nan grehi!"
„„Oću, slugi moji, kako i vi mane;
Vaše je življenje va vere taknjeno,
A duša spasena va dike nebeskoj.“"
Šli su slugi doma majke povedati. 40
Pa govori majka svetoj Katarine:
„Kčerko Katarino, oprosti mi grehi!“
„Oću, majko moja, kodi i vi mane;
Za devet meseci, keh ste me nosili.
Vaše je življenje va vere taknjeno, 45
A duša spasena va dike nebeskoj.“"
Sad govori otac svetoj Katarine:
„Kčerko Katarino, oprosti mi grehi!“
„„Oču, ćaće moji, kodi i vi mane.
Vaše ni življenje va vere taknjeno, 50
Pa duša prokljeta va mukah paklenskeh.""
Датотека:Murat Sipan vinjeta.jpg
