Ao sveti Lovrenac,
Ki j' va pustinje prebival
Sedan let i sedan dan.
K njemu dojde Marija:
„Bog pomozi, Lovrenac!“ 5
,Bog te sprimi Marijo!'
„Kamo ideš, Lovrenac?"
,Iden malo domaka.'
I već dojde domaka.
I govori majčice: 10
,Boga vama, majčice!
Iman van ja još koga?'
„Oj ti, sinko Lovrenac,
Imel si ti sestricu,
Po imenu Ančicu, 15
Pa s' volela češati,
Leh po vodu hodati;
Pa ju mladu zakljenen
Suboticu kvatrnu:
- Kad ideš po vodicu 20
Z ribicun se stvorila
I z ribicun hodila,
Kako saka ribica. -“
„Ništa zato, majčice,
Specite mi brašnaca, 25
Da gren iskat sestricu,
Po imenu Ančicu.'
I već projde Lovrenac,
Ide iskat sestricu.
Već je došal k vodice, 30
Tu se lačan nahrani.
I žejan se napoji.
K njemu vela riba gre,
I već stegne ćordicu,
Da posiče ribicu. 35
Ribica mu govori:
„„Neposikaj ti mane,
Ja san oca kodi ti,
Ja san majki, ke i ti;
Mane j' majka zakljela 40
Suboticu kvatrnu,
Nedeljicu kvatrnu:
- Kad ideš po vodicu,
Z ribicun se stvorila
I z ribicun hodila, 45
Kako saka ribica. -""
Al govori Lovrenac:
,Oj sestrice Ančice,
Bin te mogal škapulat?'
„„Ne, Lovrenac bratiću, 50
Leh po sudu vičnjemu.
Leh ti hodi domaka,
Pak ti reci majčice:
Ono moje ruhace,
Ko san mlada spravila, 55
Neka mi ga podele
Ubogen sirotican.
Ono zlato i srebro,
Ko san mlada spravila,
Neka mi ga ponesu 60
Majke božjoj na Trsat,
Neka fratri mi maše
Za ubogu dušicu.“"
Narodne pripovietke i pjesme iz hrvatskoga primorja, pribilježio in čakavštinom Fran Mikuličić, u Kraljevici, Slovi primorske tiskare, a troškom piščevim, 1876., str. 141-144.
