Šal je sveti Mikula
Gore va črnu goru,
I oseče jelvicu,
Rasplati ju na troje;
I načini Mikula 5
Z jednoga kusa jarbolac,
A z drugoga timunac,
A z trećega vas brodac.
Misli, misli Mikula,
Kud će plavčicu v more. 10
Plavčica j’ šla po kopnu,
Kako da bi po moru.
Ukrcal je Mikula
Sedamdeset sedam duš,
I ozgor još on jedan. 15
Za njim teče Marija,
I poprosi Mikulu:
„Zami me ti, Mikula!“
„„Ne morem vas, Marijo:
Plavčica je malahna, 20
Ćuda duš mi je nutre,
Sedamdeset i sedam,
I još zgora ja jedan!“
„Zami me ti, Mikula,
S ručicami ću vozit 25
I s krilcen ću ti jadrit!“
Mikula joj govori:
„„Stante na brod, Marijo!““
Kad su prišli na more,
Tad Mikula govori: 30
„Počekajte, Marijo!
Prigledajte barčicu,
Ja gren malo zaspati.“
Još Mikula ne zaspi,
Da Marija zavapi: 35
„Stan se gori, Mikula,
Na jarbolcih je huda stvar!“
I Mikula govori:
„„Ko si božje, hodi k nam,
Ako pak si hudoba, 40
Beži, hodi ća od nas!""
To se s Mikulom rugaše
I va njega pljuvaše,
Njemu se oceraše.
Mikula skoči na jarbolac 45
I to popade za pete
I hiti v sred morske pučine.
Kuda to Mikula hitaše,
Tud živi oganj goraše,
Kud Mikula jadriše, 50
Biše tiha bonačica.
